Kum 1984 khan Lalthangruna Sailo leh Lalhlimpuiite fa pathumna ni turin Khawhai khuaah ka piang a, Khawhai, Champhai, Shillong leh Madhya Pradesh-ahte ka zir hnuah kum 2007 khan Master of Science (Forensic Science) ka zir zo a. World Bank Company hnuaia ka thawh hnuah Govt. High School, Lungleiah ka thawk leh a, exam hrang hrang ka beih hnuah Mizoram Legislative Assembly Secretariat-ah Committee Officer hnaah ka tling ve ta hlauh a. Kum eng emaw chen ka thawh hnuah ka kai sang a, tunah hian Under Secretary hna chelhin College Veng, Aizawlah nu leh pate nen kan cheng mek a ni.
Ka lehkhabu, Khuarei Khawrel – I hi India leh a chhehvel chanchin, tawi leh kimchang thei ang bera ka ziah a ni a, sakhaw hrang hrang chanchin atanga chhuiin chu’ng sakhua, a bikin Islam (Mughal)-in India a awp zui dan te, East India Company chanchin te, zawi zawia Indian nationalism than chhoh dan te, kum 1857 Helna leh British Crown-in a awp tak dan te, chu’ng kara TH Lewin (Thangliana) lo lan dan leh missionary hmasa lo luh dante ziah a ni a. He’ng thil thlen rual zel hian Mizoram (Luhshai Hills)-a thil thleng chanchin pawh dah a ni a, a chhunzawmna Khuarei Khawrel – II, ka ziah lai mek nen hian kum 8 hmel a hmu ve tawh a ni. Mizo nawlpui hian India leh a chhehvel history hi kan hre tawk lo em em a, chumi kawnga thahnem ngaihna nasa tak avanga he lehkhabu hi ziak ka ni e.
